မြန်မာတိုင်းမ်း ၊ အတွဲ ၂၉ ၊ အမှတ် ၅၇၀ (၂၅ - ၃၁ ၊ ၅ ၊ ၂၀၁၂)
ဂျပန်နိုင်ငံမှ
ကားထုတ်လုပ်တင်ပို့ ရောင်းချသော ကုမ္ပဏီများအနေဖြင့် မြန်မာနိုင်ငံတွင်
ကားထုတ်လုပ်သည့် စက်ရုံများ လာရောက် ရင်းနှီးမြှုပ်နှံရန် အလားအလာများစွာ
ရှိနေသည်ဟု ပြည်တွင်းကားအရောင်းစင်တာပိုင်ရှင်များက ပြောသည်။ "နောက်ပိုင်းမှာ ကားကိုတင်သွင်းတာထက် ကားကုမ္ပဏီတွေ ပြည်တွင်းမှာ ထုတ်လုပ်တာတွေ ဖြစ်လာမှာပါ။ အလုပ် အကိုင်အခွင့် အလမ်းတွေလည်း ရှိလာပြီး ၀ယ်လက်တွေအတွက် ပိုပြီးအဆင်ပြေ လာမယ်။ ကားအပိုပစ္စည်းတွေ ပေါလာ မှာပေါ့။ ကားပြင်ချင်ရင် ကုမ္ပဏီပို့လိုက် တာနဲ့ကို အသစ်အတိုင်းပြန်ဖြစ်လာမှာ"ဟု ဆာကူရာကားအရောင်းစင်တာ ဥက္ကဋ္ဌ ဦးဌေးအောင်က ပြောသည်။
နိုင်ငံတော်သမ္မတ ဦးသိန်းစိန်၏ ဂျပန် ခရီးစဉ်အပြီးတွင် ဂျပန်နိုင်ငံမှ မြန်မာ နိုင်ငံတွင် ရင်းနှီးမြှုပ်နှံမှုများ ပြုလုပ်ရန် ပိုမို စိတ်ဝင်စား လာပြီး တိုယိုတာ၊ နစ်ဆန်း၊ ဆန်နီ၊ မစ်ဆူဘီရှီ အစရှိသည့် ကား ကုမ္ပဏီများလာရောက်နိုင်ဖွယ်ရှိသည် ဟု ကားအရောင်းစင်တာ လုပ်ငန်းရှင် များက ခန့်မှန်းသည်။
"မစ်ဆူဘီရှီအနေနဲ့ ပြည်တွင်းမှာ စက်ရုံလာရောက်တည်ဆောက်ဖို့ ရှိပါ တယ်။ ကားထုတ်လုပ်တဲ့ လုပ်ငန်းကို လည်း ပြည်တွင်းမှာ လုပ်ချင်ပါတယ်။လုပ်ဖို့လည်း ရည်ရွယ်ချက်ရှိပါတယ်" ဟု မစ်ဆူဘီရှီ ရန်ကုန်ရုံးခွဲလက်ထောက် အထွေထွေအုပ်ချုပ်ရေးမှူး ဦးမောင် မောင်တင်က ပြောသည်။
မစ်ဆူဘီရှီနည်းပညာဖလှယ်ပွဲကို ရန်ကုန်မြို့ ချက်ထရီယမ်ဟိုတယ်တွင် မေလ ၁၆ ရက်နေ့တွင် ကျင်းပခဲ့ပြီး မစ်ဆူဘီရှီနည်းပညာ ကုန်ပစ္စည်းများ အား မိတ်ဆက်ပေးခဲ့သည်။
"နောက်ပိုင်း ကားထုတ်လုပ်တဲ့ ကုမ္ပဏီတွေ ပြည်တွင်းဝင်လာမယ်ဆိုရင် ကျွန်တော်တို့ ကားအရောင်းစင်တာတွေ အနေနဲ့ လက်တွဲ လုပ်ဆောင်သွားရမှာ ပါ။ ရေရှည်မှာ ဒီလိုပဲသွားရမှာပဲ" ဟု ဦးဌေးအောင်က ပြောသည်။
မြန်မာနိုင်ငံအနေဖြင့် ၂၀၁၁ ခုနှစ်၊ စက်တင်ဘာလတွင် ထုတ်ပြန်ခဲ့သော ယာဉ်အိုယာဉ်ဟောင်းလဲလှယ်သည့် မူဝါဒမထွက်ရှိခင်ကပင် ဂျပန်ကားဟောင်း များကိုသာ တင်သွင်းအသုံးပြုခဲ့ကြသည်။
ကားအသစ်များ တင်သွင်းခွင့်ပြုရာ တွင်လည်း ဂျပန်ကားများကိုသာ ပိုမို ကြိုက်နှစ်သက်သည်ကို တွေ့ရသည်ဟု ကားဝယ်ရောင်း သမားများက ပြောသည်။
"မြန်မာလူမျိုးတွေက ဂျပန်ကားနဲ့က ရင်းနှီးပြီးသား၊ အခုလည်း ဂျပန်ကားတွေကိုပဲ လူကြိုက်များတယ်။ ဈေးတွေ ကျိုးသွားလို့ အရောင်းအ၀ယ်တော့ နည်းနည်းအေးနေတယ်" ဟု ကားအရောင်းအ၀ယ်လုပ်သူ ဦးအေးမင်းက ပြောသည်။
Posted in: သတင်း
0 comments:
Post a Comment